郭富城憑其「黃金右腳」為離世的尹志強入波後，其足球聲望再度提升，足以令今年奪得《世界盃》獨家播映權的有線電視垂青，《世》籌委會經理曾展章坦言：「難得一位明星咁好波，當然要借將，雙方已經傾緊，錢唔係問題，阿城都想上嚟玩吓！」
繼早前傳出有線以千萬價斟李克勤過檔講《世界盃》未成事後，最近又有消息指，有線其實有意邀郭富城為《世界盃》擔任嘉賓主持，希望這位「舞台王者」涉足球壇，一嘗「講波」樂趣。
雙方關係友好
身為晨曦足球隊成員的郭富城，繼早前在尹志強紀念球賽中，射入有意義的一球後，其「好波」之名聲節節上升，令有線覺得噱頭十足，希望借這位如此好波又好歌的阿城，為《世》增添娛樂色彩。
過往阿城跟有線娛樂台之關係向來友好，今次合作對有線而言可謂順理成章。據知，阿城目前跟無綫並無合約束縛，若「効力」有線，根本不需如「無綫契仔」李克勤般忌諱。
與無綫冇合約
就此消息，昨日得到《世》籌委會經理曾展章證實，他說：「播映《世界盃》賽事，當然有明星上嚟助陣會更有 Gimmick（噱頭），難得阿城呢位明星咁好波，我哋會向『娛樂台』借將，總之錢唔係問題，佢都想上嚟玩吓嘅！」
郭富城經理人小美昨日則有保留說：「冇咁嘅事！」估計是想低調行事，怕招搖而遭無綫阻撓。不過，無綫非戲劇製作總監何麗全昨就阿城「効力」有線一事，坦言「冇問題」，他說：「阿城鍾意足球嘛，佢幫有線講波冇問題，我哋又冇合約，無綫會尊重佢意願嘅。」